Делегација на Владата на Република Северна Македонија, предводена од Националниот координатор за воени и полициски ветерани, Стојанче Ангелов и Драган Василевски, надворешен соработник за одбрана на премиерот Заев , денеска положи венец на споменикот „Мајкино скршено крило“ на плоштадот „Слобода“. Претставниците на Владата оддадоа почит на педесет и четворицата загинати припадници на поранешната ЈНА, кои настрадаа на просторите на поранешна Југославија за време на војната во 1991/92 година.
По повод поменот на припадниците на поранешната ЈНА, кои загинаа во војните при распадот на СФР Југославија, а потекнуваа од нашата држава, Армијата на РСМ организираше церемонија за полагање венци цвеќе со воени почести. На настанот, кој е во организација на „Здружението на воени инвалиди и загинати од Македонија 91/92“ во соработка со Националниот координатор за воени и полициски ветерани Ангелов, присуствуваа и положија цвеќе и претставници на семејствата на воените инвалиди, членови на семејствата на загинатите од воениот конфликт при распадот на СФРЈ, како и делегација на Претседателот на Република Северна Македонија, Стево Пендаровски, како и делегации предводени од началникот на Генералштабот на АРСМ, генерал-мајор Васко Ѓурчиновски и од градоначалниците на Општина Центар и на Град Скопје, Саша Богдановиќ и Петре Шилегов.
