Неотворањето на преговорите на ЕУ со Северна Македонија и Албанија е стратешка грешка со која е изгубен кредибилитетот на Унијата и со тоа е отворена вратата на други големи светски сили, изјави претседателот на Европската народна партија (ЕПП) во заминување, Џозеф Даул.
„Покажавме недостиг на визија и решителност и го прекршивме нашето ветување, а со тоа го изгубивме кредибилитетот во регионот и ја оставивме вратата отворена за Русија, Кина, Турција и за земјите од Заливот“, рече Даул на почетокот на дводневната пленарна седница на ЕПП, која почна денес во Загреб.
Даул, кој денес треба да биде заменет на изборите за ЕПП од Доналд Туск, сегашниот шеф на Европскиот совет, исто така истакна:
„Потребна ни е силна и обединета Европа, која може да ја гарантира својата позиција во меѓународен контекст затоа што ниту една земја не може да се соочи сама со предизвиците среде империјалистичката политика на Русија и Кина, гиганти со јасна визија, кои не треба да ги оправдуваат своите одлуки пред граѓаните. Ние треба да ги браниме нашите граѓани, компаниите и нашите вредности“.
