Бразилскиот претседател Жаир Болсонаро го обвини холивудскиот актер Леонардо Дикаприо дека дал пари за палење на Амазон. Претседателот не достави никакви докази, но и претходно ги обвинуваше невладините организации, критични кон неговата политика, за предизвикување на пожарите кои оваа година ја опустошија прашумата.
Неколку апсења беа извршени во рамките на контроверзните и недокажани обвиненија за пожарите, со цел да се добијат средства преку донации.
Дикаприо, кој вети 5 милиони долари за Амазон, ги отфрли обвиненијата на Болсонаро.
Се чини дека најновите коментари произлегваат од апсењето на четворицата волонтери пожарникари од државата Пара, кои се под обвинение дека го започнале пожарот поради собирање донации од НВО.
Групите за човекови права, невладините организации и критичари тврдат дека полициската операција против нив била политички мотивирана и обид за малтретирање на групите за животна средина.
Пожарите во Амазон, кои избувнаа во август годинава, предизвикаа глобална загриженост за „белите дробови на планетата“.
