Претседателот на Косово Хашим Тачи изјави дека новото раководство на Европската унија треба да докаже дека е одржлив партнер на регионот Западен Балкан, кој, според него, се наоѓа на политичка и историска крстосница.
На годишната конференција за Западен Балкан во организација на „Пријатели на Европа” во Брисел, Тачи нагласи дека јасната европска перспектива е клучна за гарантирање на долгорочниот мир и стабилност во регионот. Тој оцени дека новото раководство на Унијата мора да ја докаже визијата, храброста и лидерството, исполнувајќи ги ветувањата кон државите од Западен Балкан и докажувајќи дека се одржлив партнер на државите во ргеионот.
Според Тачи, одложувањето и доцнењето со проширувањето на ЕУ е всушност повик за нов хаос на Балканот.
– Стратегијата на проширување на ЕУ со земјите од Западен Балкан креираше уверување дека Унијата и натаму дава одлучувачки поттик кон целите на Косово, Црна Гора, Албанија, Северна Македонија, Србија и Босна и Херцеговина во интеграцијата на ЕУ, но настаните кои следуваа нè демантираа сите нас.
