Секоја земја во дипломатијата го истакнува својот идентитет, својата културна вредност, својата историска традиција. Улогата на дипломатијата е да гради мостови, пријателства, а првите 50 години се секогаш најтешки во градењето на дипломатијата. Ова беа пораките од конференцијата „50 години Македонска дипломатија”, што во организација на Министерството за надворешни работи на Северна Македонија и Дипломатскиот клуб – Скопје денеска се одржа во МНР.
Шефот на дипломатијата Никола Димитров рече дека професионалната дипломатија е темелот на нашиот успех и Министерството за надворешни работи е куќата која ги чува, ги надградува и ги мобилизира искуствата научени низ годините.
– Поучени од минатото кога некои отворени прашања ги блокираа интегративните процеси, но и служеа како изговор за неодговорна домашна политика, избравме одлучен и проактивен пристап при етаблирање на државата како стабилен и одговорен регионален и европски чинител. Практикувањето политика на отворен пристап насочен кон решавање на проблемите и отворените прашања, треба да остане во основата на нашите дипломатски активности, рече Димитров.
Тој истакна оти постојано треба да се зацврстуваат и надградуваат темелите врз кои ќе почива нашата дипломатија, ориентирана кон резултати во нашите надворешно-политички приоритети и интереси и додаде дека квалитетна и професионална дипломатска служба е врвен државен интерес од кој зависи нашата долгорочна стабилност и просперитет.
– Компасот на мултилатерализмот го покажува најкраткиот и најбезбеден пат до било која дестинација, тој компас треба да продолжи да ја води нашата дипломатија. Треба да задржиме видлива, проактивна и препознатлива позиција во мултилатералната арена и да бидеме дел од државите кои директно придонесуваат кон колективните решенија на денешницата, рече Димитров.
Тој посочи дека визијата го одредува патот на нашата диполоматија и токму визијата што ја имаме пред очи ни овозможува да ја видиме Северна Македонија како рамноправна членка и партнер во светското семејство на држави.
– Водени од изворните европски вредности и нејзиниот потенцијал за квалитативна трансформација на земјите членки, нивната стабилност, безбедност и просперитет, членството во Европската Унија претставува врвен приоритет на нашата надворешна политика. Наша крајна цел е преку процесот на европско пристапување, да создадеме предуслови за зрело и одговорно демократско општество по урнек на докажаните европски демократии. Верувам во нашите европски амбиции и потребата од брз европски пробив, заклучи Димитров.
Словенечкиот амбасадор во земјава Милан Јазбец истакна дека првите 50 години во градењето на една дипломатија се најтешки.
– Вие денес одбележувате 50 години дипломатија. Тоа значи дека сте успеале. Македонија и Словенија се многу слични и во дипломатијата почнаа со неформален капацитет, рече Јазбец, и додаде дека дипломатијата е исто со националниот идентитет на една земја.
Изрази надеж дека Северна Македонија наскоро ќе го заврши формалниот дел и ќе стане дел од процесот на европската интеграција и ќе почне да дејствува како да е дел од него.
Претседателот на Дипломатскиот клуб, амбасадорот Виктор Габер рече дека денеска се одбележува 50-годишнината од формирањето на органот на извршната власт за односи со странство.
– Денес го заокружуваме процесот на одбележување на оваа 50-годишнина, која претставува симболичен, но многу значаен датум за нашите односи со странство. Имаме институционален однос кон овие проблеми во одбрана на интересите на државата и нејзините субјекти имаме значаен канал на афирмација на интересите на државата, но и афирмација на ситд капацитети, рече Габер.
Рече дека секоја земја во дипломатијата го истакнува својот идентитет, својата културна вредност, својата историска традиција и затоа ние сме горди оваа генерација на овие 50 години да остави таков белег.
– Во надворешната политика клучно влијание има развојот на внатрешните односи. Ние денес како држава сме самостојна суверена, етаблирана на меѓународен план. Имаме многу добра основа за понатамошен развој на сите субјекти за афирмација на земјата. Не е лесно и не е ниту едноставно, бидејќи вие мора да имате материјални и човечки ресурси кои ќе одговараат на предизвикот, кои ќе одговараат на другиот партнер и ќе одговараат со своите знаења да ги спроведат тие интереси. Затоа ние сме многу горди што успеавме во овие години од осамостојувањето да изградиме еден орган, што првично беше од 33 луѓе, а сега имаме една разгранета структура на Министерство за надворешни работи и на многу значајни субјекти кои помагаат. Тука е научната фела, медиумите, инситуциите во државата, рече Габер.
На вториот дел на Конференцијата свои обраќања имаа и заменик министерот за надворешни работи, Андреј Жерновски, државниот секретар Зоран Попов, дипломати и амбасадори во Министерството за надворешни работи. Во фокусот на нивните обраќања беше развојот на дипломатската служба од формирањето на Бирото за односи со странство во 1969 година, кое е претходник на современото Министерство за надворешни работи, кое се етаблираште во 1991 година, на Денот на независноста.
