Горно и Долно Лисиче денес беа збогатени со нови садници. Имено, во кругот на училиштето „Гоце Делчев“ и околу градинката беа засадени висококвалитетни листопадни и зимзелени дрвја. Со оваа акција Општина Аеродром го заокружи есенското засадување садници на територијата на Општината, во кое се вклучија градоначалникот Златко Марин, советниците, општинската администрација, учениците и вработените од училиштата и градинките, како и голем број граѓани.
Во рамките на годинешните акции беа засадени околу 3 300 садници, со што вкупната бројка за изминатите две години изнесува 5 500 дрвја. Во буџетот за 2020 година се предвидени дополнителни 20 милиони денари за набавка на садници, така што и оваа бројка двојно ќе се зголеми. Општина Аеродром им се заблагодарува на сите граѓани што се вклучија во овие акции и што го дадоа својот придонес за зазеленување на Општината.
