Цариник од Скопје, водич на смена доби кривична пријава бидејќи колегите од преминот Табановце зеле близу 2.000 евра мито за да не наплатат царина од увозници на роба, информираше МВР.
СВР Куманово поднесе кривична пријава против С.М.(35) од Скопје, поради постоење основи на сомнение дека сторил кривично дело „несовесно работење во службата“, казниво по член 353-в од Кривичниот законик.
Пријавениот, извршувајќи службени работни задачи како царински службеник – водач на смена во Отсек за патнички промет во царинска испостава Табановце – автопат во Царинарница Куманово , на работна смена од 20.00 часот на 27.07.2019 до 08.00 часот на 28.07.2019, несовесно постапил во вршење на своето дискреционо овластување со пропуштање на должен надзор како единствен непосреден старешина на смената, при што им овозможил на двајца царински службеници и други кои биле на смена во посочениот период, на влез во Р.С.Македонија, од граѓаните кои остварувале влез во Р.С.Македонија на Граничниот премин „Табановце“ противправно за себе да наплатат 1.670 евра и 190 швајцарски франци, а на штета на Буџетот на Р.С.Македонија, преку избегнување на царински давачки за роба која подлежи на царинење при влез во Р.С.Македонија.
