Надворешната канцеларија за криминалистички работи Гостивар поднесе кривична пријава против Л. Е. (52) од Гостивар поради постоење основи на сомнение за сторено кривично дело даночно затајување.
Во периодот од 2014 до 2018 година во Гостивар, пријавениот, во својство на физичко лице, во континуитет избегнал да уплати персонален данок на доход на други видови приходи во вкупна вредност од 713.824 денари со пресметана вкупна камата за временскиот период во износ од 184.720 денари.
Паричните средства, како што информираат од полицијата, пријавениот ги остварил од изградба и продажба на станови за кои бил обврзан да плати данок констатиран со записник од надворешна контрола, извршена од страна на Управата за јавни приходи – дирекција Тетово.
