– Конкретни мерки треба да се преземат за да се реши проблемот со загадувањето на воздухот во Скопје и другите градови, а за тоа стручни кадри во институциите треба посериозно да се ангажираат и да се одвојат конкретни средства за решавање на тој проблем.
Ова денеска го истакнаа група пратеници од ВМРО-ДПМНЕ кои поднесоа Информација за енормното загадување на амбиентниот воздух, која денеска беше разгледана од собраниската Комисија за транспорт, врски и екологија и беше предложено таа да биде ставена на собраниска седница.
Пратеникот Драган Данев од ВМРО-ДПМНЕ истакна дека нема видливи резултати во однос на подобрувањето на амбиенталниот воздух во Скопје и останатите градови.
– Три години чекаме власта да преземе мерки. Ни требаат чесни и одговорни кадри во институциите кои се грижат за оваа проблематика. Проблемот е во чесна имплементација на законите. Спрегата со бизнисот, со политиката е огромна. Главниот проблем е загадувањето и индустријата, потенцира Данев.
Лилјана Поповска од ДОМ рече дека имаат дадено предлог за забрана на увоз на отпад кој би се користел како енергенс. Посочи дека станува збор за Закон, кој оваа недела ќе биде на седница, може да се изгласа и примени и на тој начин ќе се спречи еден извор на загадувањето.
Според неа, еколошки резултати нема, проблем се недоволните стручни кадри во институциите, како и недоволно заинтересираните кадри во Министерството за животна средина и просторно планирање.
– Индустријата е главниот загадувач. Кај индустријата треба контроли, треба сериозно занимавање од страна на Државниот инспекторат за животна средина. Таа институција или да работи како што треба или нека се растури. Таа институција како да не постои, затоа што не може да не убеди дека нема загадување. Нека кажат во сите овие години колку пати на една рака ќе се избројат, колку вкупно имаат забележано големи индустриски загадувања, хаварии. На прсти се бројат, а секојденвно гледаме дека има испуштања на загадувачки материи. Тоа што значи, дека не си ја вршат работата или некој е корумпиран, па не сака да ја врши работата, или незнае, нема трето. Треба чесно, стручно, свесно, одговорно да се работи. Изгледа дека корупцијата е можеби најголемото загадување во Македонија, додаде Поповска.
Членовите на Комисијата од СДСМ нагласија дека се одвоени средства за инвертер клими, беше објавен јавен повик за субвенции за купување велосипеди и електрични тротинети и се набавуваат 33 нови еколошки автобуси.
Пратеникот Костадин Ацевски од СДСМ рече дека во Информацијата поднесена од пратеници од ВМРО-ДПМНЕ нема ниту мерки, ниту предложени заклучоци, ниту едно решение од тие кои ги нуделе.
– Откога ВМРО-ДПМНЕ не е на власт полесно се дише и тоа во сите сфери на општеството за сите. Бројот на денови со високо загадување во 2019 година е намален и е драстично помал од 2012 година. Ова се прави врз база на споредба на анализа на податоците од мерните станици за загадувањето на воздухот. Истражувањето од градските власти на крајот на 2016 година укажува дека главен фактор за загадувањето на воздухот во Скопје е начинот на загревање на домаќинствата кои учествуваат во загадувањето со 32 проценти, а потоа следи сообраќајот со 20 проценти. Воведовме мерки за субвенција за замена на нееколошките начини на загревање на домаќинствата, субвенција за инвертер клими, печки за пелети…рече Ацевски.
Додаде дека 33 еколошки МАН автобуски од идниот месец ќе почнат да возат по скопските улици, субвенционирале вградување плински уреди во возилата, се сменил Законот за увоз на возила во кој старите и нееколошки возила се со многу поголеми давачки, а реализацијата на гасификацијата е на многу висок процент.
