Предлогот на американскиот претседател Доналд Трамп за мировен план за надминување на израелско-палестинскиот конфликт е „кошмар за мирот и регионот”, напиша на Твитер шефот на иранската дипломатија Џавад Зариф, пренесе Тасс.
Зариф изрази надеж дека американската иницијатива ќе прозвучи како сигнал за аларм за сите муслимани и ќе ги натера да се обединат.
Портпаролот на иранското Министерство за надворешни работи Абас Мусави изјави дека Иран е подготвен да се спротивстави на планот на Трамп, што го нарече „заговор”, што и се заканува на целата муслиманска заедница.
-Од иранска гледна точка проблемот со Палестина е најважниот за исламскиот свет, рече Мусави.
Против планот на Трамп се изјасни и либански Хезболах, групата која е поддржана од Иран, пренесоа британските медиуми. Таа соопшти дека предлогот на американскиот претседател ги нарушава правата на Палестинците, односно им го одзема правото да се вратат на својата земја и обвини некои арапски држави дека се соучесници во овој „срамен договор”, што му штети на регионот.
