Главниот обвинител на САД Вилијам Бар им порачал на блиските роднини дека размислува да си поднесе оставка откако американскиот претседател Доналд Трамп го игнорираше неговото предупредување за објавите на социјалните мрежи за случајот во Министерството за правда, изјави за американски медиуми службеник на администрацијата.
Тоа е објавено неколку дена откако Бар јавно го критикуваше претседателот и рече за време на телевизиско интервју дека твитовите на Трамп за работата и вработените во Одделот за правда ја прават „невозможна” работата на обвинителот.
Следниот ден, лидерот на САД го игнорираше барањето на Бар, тврдејќи дека тој има „законско право” да интервенира во кривични случаи и да ја поткопа историската независност на Министерството за правда.
Според американски медиуми, не е познато колку бил сериозен Бар кога зборувал за оставката или за неговиот притисок врз Трамп да не објавува провокативни твитови за работата на неговото министерство.
Бар е еден од најблиските соработници на Трамп во администрацијата и е истакнат бранител на политичките одлуки на Трамп.
