Љупчо Тодоровски, кој е познат по прекарот Радникот, е уште еден сведок што денеска сведочеше во случајот „Монструм“ за петкратното убиство кај Смилковско Езеро кога тој бил директор на Бирото за јавна безбедност (БЈБ) во МВР пишува 360 степени.
„Изненадувачки, Вие немате ниту еден разговор, но има разговори во кои споменувате дека некое лице сакало да ви даде информации дека нешто може да се случи. Дали сте добиле такви информации?“,
праша обвинителката Фатиме Фетаи.
Откако тој одговори дека немал, Фетаи рече дека во„бомбите“ се споменува лицето Зоран Трајковски викан Филмот, кој наводно сакал да му даде оперативни информации на Радникот.
„Го знам. Бев изненаден кога слушнав дека на некого по телефон му кажал нешто. Со еден збор, немав контакт со него, посебно пред да се случи настанот“,
рече сведокот.
Родителите на жртвите, исто така, поставија прашања во таа насока. Рекоа дека кога им земале изјави, инспекторите им велеле: „Знаевме дека ќе направат нешто, но не се надевавме дека ќе биде вакво нешто.“
„Ние во БЈБ не сме имале такво сознание, затоа што кога ќе добиете таква информација, тоа е сериозно нешто и сигурно ќе сме презеле нешто“,
одговори Радникот.
Претходно сведочеше и ексминистерката за внатрешни работи Гордана Јанкулоска.
