За да економијата продолжи во континуитет да расте со посилно темпо и тој раст да биде генериран од приватниот сектор, потребно е државата преку фискалната политика да биде ветер во грб на приватниот сектор од повеќе аспекти. Потребно е да се инвестира во човечкиот капитал, во технологии како и реформи за брза ефикасна администрација. Ова во интервју за „Капитал” го истакна министерката за финансии Нина Ангеловска.
Таа посочи дека, луѓето се оние кои се носители на продуктивноста, затоа е значајно да се инвестира во човечкиот капитал, но и во нови технологии кои ќе ја зголемат продуктивноста.
– Затоа буџетот за 2020 година е насочен кон инвестиции во човечкиот капитал, со над 60 отсто од расходната страна за здравството, образованието и социјалата како области. Она што можам да го истакнам во моментот со фискалната политика поддршката на приватниот сектор се спроведува со мерките кои ја стимулираат инвестициската активност на компаниите, нудат поддршка за зачувување на квалитетните кадри, но и делуваат на создавање на адекватни кадри на пазарот на труд. Така во годинешниот буџет за мерката за субвенционирање на придонесите за покачување на платите обезбедени се 2,4 милијарди денари, за мерките за зголемување на конкурентноста на приватниот сектор 3 милијарди денари и за активните мерки за вработување 1,4 милијарди денари. Преку мерките за поддршка на инвестициите се поттикнува и набавка на нова технологија преку поврат на дел од вложените средства, на тој начин поттикнувајќи ги фирмите да ја заменат. Во однос на замена на застарената технологија постојат исто така можности, преку мерките за поддршка на економски раст, со кои се враќа дел од инвестицијата на компаниите направена во нови технологии – рече Ангеловска.
Ангеловска вели дека за да приватниот сектор биде двигател на растот, државата за да биде ветер во грб, потребна е и ефикасна администрација.
– Само со дигитализација верувам дека e можна департизација и ефикасна администрација. Дигитални процеси, кои ќе го отстранат пристрасниот човечки фактор во носење на одлуки, безхартиена околина, организирани и јасни правила – единствено тоа мислам е решението и за справување со корупција, за зголемена продуктивност и подобра околина за водење бизнис. – вели Ангеловска.
Таа посочува дека растот за годинава е планиран на 3,8% и дека тоа е реална проекција во линија со Народната банка. Проекцијата се базира на очекувањата за раст на бруто инвестициите од 8%, раст на приватната потрошувачка како резултат на раст на вработеноста и платите и на извозот.
-Предвидениот раст на економската активност се очекува да биде придружен со раст на вработеноста и намалување на невработеноста. Се очекува во 2020 година бројот на вработените да порасне за 2,1 процентни поени, додека стапката на невработеност да се намали на 16%. Растот на просечната нето-плата се очекува да изнесува 6,3% на номинална основа-вели Ангеловска.
