Последните информации од здравствените власти на Белгија за потврдениот број на заразени од Ковид-19 покажуваат дека епидемијата не стивнува, јави дописничката на МИА од Брисел.
Детектирани се нови 185 случаи на зараза, од кои за осум не се знае од каде потекнуваат, односно не се лица кои се вратени од ризични подрачја или имале контакт со ризични лица. Со ова се потврдува дека вирусот локално се шири.
Вкупниот број на потврдени случаи со коронавирус во Белгија сега изнесува 1.243, но извесно е дека реалниот број е поголем, бидејќи не се тестира целото население.
Шестнаесет илјади тестови се реализирани до сега од почетокот на епидемијата.
Властите пренесуваат дека вчера починале уште петмина пациенти, вкупниот број мртви од коронавирусот во Белгија сега изнесува десет.
