Европскиот претставник за надворешна политика, Жосеп Борел, разговарал телефонски со српскиот претседател, Александар Вучиќ и го уверил дека ЕУ бара начин да му помогне на регионот во кризата со коронавирусот, јави дописничката на МИА од Брисел.
Прес службите соопштија дека Борел му порачал на Вучиќ дека во овој момент е потребна соработка и солидарност.
-Високиот претставник нагласи дека ЕУ бара начин како западниот Балкан да се придружи на иницијативите на ЕУ во овој поглед и како најдобро да понуди помош за ублажување на социо-економските последици од коронавирусот, пренесуваат од прес службата.
Вучиќ остро ја критикуваше Европската унија за недостатокот на солидарност кон регионот, поради рестрикциите за увоз на заштитна медицинска опрема.
Борел му рекол на Вучиќ дека е потребна блиска координација со соседните земји и со ЕУ и истакнал дека е потребно создавање на позитивна клима за рестартирање на дијалогот со Приштина.
