Воено раководство ќе биде испратено да води болница во Фокшани (округот Вранча, централна Романија), како што беше направено за болниците во северниот град Сучава и во централниот Дева. Тоа го објавија денеска романски медиуми, повикувајќи се на министерот за здравство Нелу Татару.
Одлуката на министерот беше водена од фактот дека управителот на регионалната болница во Фокшани е заразен со новиот коронавирус, а членовите на раководството се негови директни контакти.
Петнаесет медицински лица во регионалната болница Фокшани се заразени со новиот коронавирус, рече министерот, посочувајќи дека планот е да се спречи ширење на заразата во болницата. Целиот медицински персонал ќе биде тестиран поради тоа.
Во моментов, околу 50 случаи на инфекција кај медицински персонал се потврдени во округот Вранча, од кои 35 се потврдени во воената болница Фокшани. Во округот има три жртви на Ковид-19.
