Вонредната состојба до сабота, се прават проценки дали ќе има продолжување

Премиерот Оливер Спасовски вчера изјави дека Владата се уште нема донесено одлука дали ќе побара вонредната состојба во земјава да продолжи и во наредниот период. Тој рече дека се прават анализи и проценки врз основа на здравствената состојба.

– Јас апелирам да почекаме ден два, кога ќе заседава Владата и да се направи проценката дали ќе имаме потреба од нова вонредна состојба и колкава ќе биде, вели Спасовски.

Тој кажа дека се изготвува и извештајот до претседателот Стево Пендаровски, за тоа што е се направено во текот на оваа вонредна состојба. Останува на ставот дека приоритет е пред се животот и здравјето на граѓаните, а врз основа на тој приоритет ќе ги носат и следните одлуки.

Доколку биде донесена одлука да продолжи вонредната состојба и Владата достави предлог, Советот за безбедност треба да одржи нова седница в петок и претседателот да донесе одлука за нејзино продолжување.