Во последните 24 часа во Србија се регистрирани 89 случаи на инфекција со коронавирус, од кои 30 се од Врање. Како што јави дописникот на МИА од Белград, еден пациент е починат со што вкупниот број на починати се искачи на 231 лице, објавено е на владиниот сајт ковид.рс
Вкупно во Србија се заразени 10.699 граѓани, а излекувани се 4.799 луѓе.
Епидемиолозите предупредуваат дека доколку се зголеми бројот на новозаразените во наредните денови, во Србија повторно би можеле да се воведат рестриктивни мерки.
Премиерката Ана Брнабиќ за утре закажа состанок на Кризниот штаб.
– Сега не планираме нови мерки, но апелирам уште еднаш до сите, кризата не заврши. Излеговме од најлошите времиња и можеме да живееме повеќе или помалку нормално, но сепак и понатаму мора да носиме маски, да ја задржиме оддалеченоста, изјави Брнабиќ.
Бројот на заразени лица вчера неочекувано се зголеми, а причината е новото жариште во Врање, каде повторно беше отворена Ковид болницата. Повеќето од заразените се од фабрика за мебел „Додиќ”, што е затворена пред неколку дена.
Епидемиологот Бранислав Тиодоровиќ истакна дека ситуациите во Лесковац и во Врање треба да ја предупредат цела Србија и сите работни организации и производствени погони. Тој потенцира дека е неопходно да се спроведат сите превентивни мерки и дека не смее да дојде до опуштања.
Претседателот на Србија, Александар Вучиќ, истакна дека ситуацијата е под контрола се додека бројот на новооткриени во однос на бројот на тестирани е помал од два проценти, посочувајќи дека ако не бил случајот со Врање, тој број би бил значително под два проценти.
