Шпанскиот премиер Педро Санчез доби парламентарна поддршка за петто продолжување на вонредната состојба поради коронавирусот, но повторно со тесно мнозинство и по жестока дебата, која е само показател за длабоката политичка поделеност во Шпанија.
За продолжување гласале 177 пратеници во парламентот со вкупно 350 места.
Вонредната состојба, која трае од 14 март, сега е продолжена до 7 јуни.
Иако инфекцијата со коронавирус е придушена и дневната бројка на смртни случаи падна под 100, Санчез сака да ја одржи вонредната состојба дополнителни петнаесет дена во кои ќе може да се ограничи движењето на граѓаните и нивното собирање. Ова е неопходно со цел постепено и контролирано укинување на мерките за да не дојде до ново избивање на вирусот, тврди тој.
„Никој нема право да го уништи она што го постигнавме“, рече Санчез во обраќањето пред парламентот.
Дополнителни 416 жители се детектирани како заразени денеска во Шпанија, така што вкупниот број на инфицирани се искачи на 232.555, што е за 0,18 проценти повеќе од претходниот ден. Регистрирани се и 95 нови смртни случаи, па бројот на починати од Ковид-19 сега изнесува вкупно 27.888.
Но, бавното отворање на земјата и економската неизвесност веќе ја зголемува фрустрацијата кај граѓаните. Во оваа насока се и обвинувањата на Пабло Касадо, лидер на конзервативната Народна партија, најголемата опозициска партија во парламентот, кој вели дека владејачките социјалисти одат предалеку во затворањето на жителите и компаниите
