Согласно денешната одлука на хрватскиот претседател Зоран Милановиќ, која стапува во сила на 2 јуни, парламентарните избори во таа земја ќе се одржат на 5 јули, неколку месеци пред редовниот рок, така што политичките партии ќе имаат 15 дена да ги презентираат своите програми.
Ден по влегувањето во сила на одлуката на Милановиќ, на 3 јуни почнуваат да течат изборните рокови.
Политичките партии, независните листи и кандидати треба да ги достават своите избирачки листи на Државната изборна комисија до полноќ на 16 јуни. Потоа, ДИК има 48 часа, до полноќ, на 18 јуни, да објави збирна листа со валидни кандидатури, по што ќе следува официјалната изборна кампања.
Хина појаснува дека доколку се чека крајниот рок, изборната кампања ќе почне во петок, 19 јуни и ќе трае до полноќ, 3 јули, кога ќе започне дводневниот изборен молк.
