Од суштинско значење е изборниот процес во Србија да не го загрозува здравјето на граѓаните, медиумите да обезбедат простор за сите политички актери и да се овозможи работата на меѓународните и домашните набљудувачи, истакна Тања Фајон, претседател на делегацијата на Европскиот парламент за односи со Србија, по видео-конференциската врска со министерот за внатрешни работи на Србија, Небојша Стефановиќ.
Како што јави дописникот на МИА од Белград, Фајон во пораката на Твитер наведе дека е неопходно „сите страни да ги намалат тензиите и поларизацијата на општеството во медиумите”.
На видео-средбата учествуваа и известувачот на ЕП за Србија, Владимир Билчик и амбасадорот на ЕУ во Србија, Сем Фабрици.
Видео-конференцијата се одржа како дел од меѓупартискиот дијалог меѓу претставници на Европскиот парламент, властите во Србија, дел од опозициските партии и претставниците на граѓанските организации, чија цел е да се создадат услови за слободни и фер избори во Србија.
