Еден од шест млади вработени го загубил своето работно место за време на пандемијата на коронавирусот, покажа анкета на Меѓународната организација на трудот (ИЛО).
Телото на ОН со седиште во Женева утврдило и дека кризата предизвикана од Ковид-19 ги намалува шансите на младите луѓе да влезат на пазарот на трудот. Десет проценти од студентите очекуваат дека нема да можат да го завршат школувањето, а половина се со став дека нивното учење ќе биде одложено.
„Ова предизвикува голема загриженост за состојбата на младите луѓе”, рече генералниот директор на ИЛО, Гај Рајдер, на брифинг за медиуми, осврнувајќи се на „генерацијата карантин” што ќе се соочи со пониски плати и поголема невработеност во наредните години.
Повеќе од 11.000 испитаници на возраст меѓу 18 и 29 години учествуваа во истражувањето.
ИЛО истакнува дека глобалната невработеност кај младите беше 13,6 проценти минатата година и пред корона-кризата, повеќе отколку пред глобалната финансиска криза во 2008 година.
