Една третина од жителите на парискиот департман Сена-Сен Дени изјавија дека во изминатите пет години биле дискриминирани поради нивното „потекло” или нивната „боја на кожата”, покажуваат резултатите на анектата на „Харис интерактив”, јави дописникот на МИА.
Над 80 отсто од анкетираните веруваат дека бојата на кожата, религијата и местото на живеење се главните фактори на дискриминација во овој департман, кој е најсиромашен во европскиот дел на Франција.
Во изминатите пет години, 28 отсто од испитаниците изјавиле дека биле дискриминирани поради нивното живеалиште. Оваа бројка изнесува 43 проценти за лицата на возраст од 18-24 години.
Истражувањето исто така укажува на дискриминација во различни области како што се полицијата, правосудниот систем, вработувањето и домувањето. Така, 81 отсто од испитаниците „сметаат дека во Сена-Сен Дени луѓето се дискриминирани од полицијата и правосудниот систем. Ова мислење го делат речиси 90 отсто од младите”, се истакнува во студијата.
Анкетираните имаат „многу големо очекување” од јавните власти, така 95 отсто од нив сметаат дека воспитување е „најдобар начин” во борбата против дискриминацијата.
