Министерот за надворешни работи Никола Димитров денеска оствари проштална средба со Душанка Дивјак Томиќ, вонредна и ополномоштена амбасадорка на Србија и досегашен доајен на дипломатскиот кор во Македонија, по повод завршувањето на нејзиниот мандат во нашата држава.
Како што соопшти МНР, на средбата беше потврдена готовноста за продолжување на досегашната соработка и развој на односите меѓу двете пријателски земји во сите области од заемен интерес, со градење на силни добрососедски односи и решеност за нивно натамошно продлабочување, заложби кои беа неодамна реафирмирани и од страна на министрите Димитров и Дачиќ во Ниш, за време на работната посета на Србија.
Двајцата соговорници ја нагласија одличната соработка во борбата со последиците од пандемијата предизвикана од вирусот Ковид 19 и напорите за нормализирање на режимот за движење меѓу двете земји. Голем придонес дадоа кризните штабови на министерствата за надворешни работи на двете земји, како и ангажманот на Амбасадата на Србија во Скопје.
Димитров го поздрави активниот ангажман на амбасадорката Дивјак Томиќ во годините поминати во Македонија и воедно и’ беше врачена благодарница за нејзините постојани напори во промовирање на српско-македонското пријателство, партнерство, билатералните односи и тесната соработка, посакувајќи и’ успех во понатамошните ангажмани.
