Американските законодавци треба да престанат да ги заплашуваат американските и европските граѓани со т.н. руска закана, напиша руската амбасада во САД на Твитер, пренесува ТАСС.
„Ги повикуваме американските законодавци да покажат воздржаност во своите емоции и проценки. Треба да одржуваме цивилизиран дијалог. Русија не напаѓа никого и нема такви намери. Престанете да ги заплашувате американските и европските граѓани со хорор приказни за некаква руска закана“, пишува во твитот.
Амбасадата се надоврза на твит од американскиот сенатор Роберт Менедез, кој претходно објави нацрт-закон со американскиот конгресмен Елиот Енгел. Предлог-законот нуди ограничување на финансиите спроведување на невнимателните планови на претседателот Трамп за повлекување на дел од американските сили од Германија.
„Сегашното присуство на американските трупи во Германија е во интерес на американската национална безбедност. Точка. Да се тврди поинаку значи да се игнорираат повеќе децении историја како и итни и актуелни закани за САД кои доаѓаат од Русија и од Блискиот Исток“, се вели во изјавата на Менедез.
