Иранската полиција уапси три лица осомничени дека се обиделе да продаваат бебиња преку „Инстаграм“, објави денес новинската агенција „Исна“.
„Уапсени се три лица кои сакале да продадат две бебиња“, рече началникот на полицијата во Техеран, Хосеин Рахими.
Тој прецизираше дека едното бебе е старо 20 дена, а другото два месеца.
Полицијата ги уапсила овие лица откако било утврдено дека тие рекламираат продажба на бебиња на „Инстаграм“. Фотографиите биле споделени на 10 до 15 различни профили на оваа социјална мрежа.
Бебињата биле купени за сума од 226 до 450 евра, а се продавале за 1.800 до 2.250 евра, рече Рахими, без да прецизира детали.
Тој нагласи дека бебињата сега се предадени на социјалната служба.
Како што објави „Исна“, еден од уапсените тврдел дека е невработен и без пари и дека бил само посредник.
