Австралиската војска денеска соопшти дека испраќа илјадници свои припадници на улиците во Мелбурн за да спречи втор бран на зараза во тоа ново жариште на коронавирусот.
Сојузната држава Викторија бележи зголемување на бројот на новозаразени со коронавирусот, со речиси 150 случаи на ден во текот на изминатата недела и со жариште во Мелбурн.
Иако бројот е сè уште мал во споредба со другите земји во светот, избувнувањето на заразата ја загрижи Австралија, која почна да ги олеснува рестриктивните мерки откако успешно го совлада вирусот.
Министерката за одбрана Линда Рејнолдс денеска соопшти дека илјадници војници ќе бидат испратени на улиците на Мелбурн „во наредните денови”.
Околу 850 војници ќе ги надгледуваат патниците од странство кои се во карантин во хотелите, додека околу двесте други ќе обезбедат логистичка и медицинска помош на локациите за тестирање, додаде министерката.
Австралиската војска веќе е на терен и ги чува границите на сојузните држави кои се затворени за посетители, но новото излегување на улиците на толку голем број војници е без преседан во кризата со коронавирусот.
Вирусот во вториот по големина град во Австралија се прошири во пошироки семејства, хотел за карантин за странски патници во карантин и во продавница за облека.
Австралија на 25 милиони жители до сега регистрира околу 7,5 илјади случаи на зараза, со 103 смртни случаи.
