Американскиот претседател, Доналд Трамп, официјално ги повлече САД од Светската здравствена организација (СЗО), кои ги обвинува за лошо управување со пандемијата на новиот коронавирус. Мерката ќе стапи на сила на 6 јули 2021 година.
Информацијата за повлекување на САД од СЗО за првпат ја пренесе сенаторот Роберт Менедез, кој на Твитер објави дека Конгресот добил текст во кој Трамп и официјално ја повлекува државата од таа организација.
„Конгресот доби текст во кој претседателот официјално ги повлекува САД од СЗО среде пандемија”, напиша Менендез, член на демократите во Комисијата за надворешни работи во Сенатот.
Веднаш потоа, американските власти ја потврдија информацијата, во која се наведува дека повлекувањето ќе стапи на сила за една година, односно на 6 јули 2021 година.
На 29 мај, Трамп рече дека САД ги прекинуваат врските со СЗО. Претходно тој испрати писмо до таа организација во кое се закани дека САД трајно ќе го прекинат своето финансирање поради „многу лошото управување со пандемијата и прикривањето докази за коронавирусот”.
САД се најголем финансиер на СЗО со околу 450 милиони долари годишно.
