Шефот на Канцеларијата на ОН за борба против тероризам, Владимир Воронцов, рече дека 700 луѓе неодамна починале во два кампа во североисточна Сирија, каде во „многу лоши услови” биле притворени околу 70.000 жени и деца блиски на борците на Исламска држава.
Луѓето, вклучително и деца, починале од „недостиг на лекови, храна” во камповите Ал-Хол и Рој, кои ги надгледуваат курдските сили.
Тој ја повика меѓународната заедница да го реши овој „голем проблем”, велејќи дека нивното држење во камповите е „многу опасно”.
Тој предупреди дека тие може да направат многу експлозивни материјали што можат да ги користат терористите за да ги продолжат своите активности во Сирија и Ирак.
Курдските сили надгледуваат уште неколку други затвори во кои има илјадници џихадисти на Исламска држава.
Воронцов рече дека ниту една земја нема да ги прими назад тие луѓе со таква многу негативна и многу опасна терористичка позадина.
Но, како што напомена, таму има околу 9.000 деца и приоритет треба да бидат деца помлади од шест години, затоа што во тој период „децата апсолутно не се во можност да бидат индоктринирани”.
Тој вели дека жените се во многу потешка ситуација затоа што тие се „жртви на тероризам” кои не разбрале што прават кога оделе во Сирија и Ирак со сопрузите, но меѓу нив има и многу „радикализирани”.
