Десетици илјади луѓе се собраа во Белорусија на митингот на изборниот ривал на претседателот Лукашенко, и покрај зголемениот притисок врз опозицијата.
Повеќе од 60.000 луѓе протестираа во главниот град Минск, според групата за човекови права Вијасна.
Митингот го организираше Светлана Тихановска, противник на долгогодишниот претседател.
Александар Лукашенко се соочи со бран протести поради неговата кандидатура за шести мандат.
Од стапувањето на должноста во 1994 година, Лукашенко изврши авторитарна контрола врз Белорусија, во стил кој потсетува на времето на Советскиот Сојуз.
Тихановска, ново лице во политиката, реши да се кандидира на изборите, откако на нејзиниот сопруг му беше забрането да се кандидира, по што беше уапсен и одведен во затвор на почетокот од оваа година.
Нејзините приврзаници се собраа на плоштад во Минск на, според новинската агенција АФП, најголемиот протест на опозицијата во поранешната советска земја во претходната деценија.
Тие мавтаа со знамиња и балони со печатени пароли на опозицијата.
„Луѓето кои сакаат пристоен живот не се криминалци“, им рече Тихановска на собраните. „Тие се наши луѓе, луѓе кои сакаат мирна промена на владата“.
„Ве молам, не работете против совеста, не одете против својот народ“, додаде таа.
