САД ќе го намалат своето воено присуство во Авганистан на околу 4.000 војници „многу брзо”, рече американскиот претседател Доналд Трамп.
„До голем степен сме надвор од Авганистан”, рече Трамп во интервју за американскиот веб-сајт „Аксиос”.
„Ние ќе го намалиме на 8.000 за многу краток временски период, потоа ќе бидеме до 4.000, сега преговараме”, рече тој, без да прецизира точно време, но рече дека тоа ќе се случи „многу брзо”.
На прашањето колку американски војници ќе останат во Авганистан на денот на изборите во ноември, Трамп рече дека ќе има „4.000 до 5.000″.
Изјавата на претседателот доаѓа откако американскиот државен секретар Мајк Помпео минатата недела изјави дека Трамп очекува сите останати американски трупи да бидат повлечени од Авганистан до мај 2021 година.
САД и талибанското движење потпишаа мировен договор во Доха, Катар, на 29 февруари, кој предвидува постепено повлекување на американските трупи. Како одговор, се очекува талибанците да спречат Авганистан да стане безбедно засолниште за терористи во регионот.
