Пропаѓањето на Еуростандард банката е настан кој што потсетува на оние од 90-тите години. Најцрните години за македонската економија. Слушнавме и за немил настан во Кавадарци во експозитурата на Еуростандард банка, настан кој потсетува на случките со штедилницата ТАТ. Колку и да е банкарскиот сектор во моментов регулиран, повторно останува фактот дека сетоа ова се случува во период на сериозна економска и здравствена криза. Воедно слушнавме и дека на само месец и половина пред пропаѓање на банката министерката за финансии ги извадила последните заштеди од банката. Но многумина штедачи ја немаа таа информација и нивните пари сега пропаднаа.
Ја прашуваме гувернерката:
- Kога адвекватноста на капиталот на Еуростандард банка падна под законскиот минимум.
- Зошто одлуката за одземање на лиценцата на Еуростандард банка се прави во овој момент и зошто истото не се направи пред избори.
- Кого штитеше гувернерката во последната година ако се земе предвид дека еден од сопствениците на банката јавно кажува дека овој проблем постои веќе една година.
- Дали толку време беше потребно избрана група на луѓе и компании да ги повлечат своите средства и да ја прекинат соработката со банката, како што е случајот со министерката за финансии.
Истовремено самата гувернерка признава дека нефункционалните кредити се 4,7% од вкупните кредити, од кој цел еден процент отпаѓал на само една банка Еуростандард банка. Значи некој свесно дозволил давање на кредити без покритие, а од вкупните нефункционални кредити де факто над 21% отпаѓа на банка која гувернерката вели дека е незначајна за банкарскиот систем врз основа на тоа што Еуростандард банка со состојба на 30 јуни 2020 година учествува во вкупната актива, вкупните депозити и вкупните кредити на банкарскиот систем, со 1,3%, 1,7% и 1,6%, соодветно.
Зошто е толерирано волку мала банка да има толку нефункционални кредити.
Добро е и да се види кои струмички компании имале кредити без покритие во Еуростандард банка и како тие се поврани со власта. Колку компании се уништени со оваа одлука и колкав е износот на депозити на правните субјекти и физички лица кои не се гарантирани и кои не можат да ги повлечат. Кој ќе сноси одговорност за влошување на состојбата во бизнис секторот кој и онака трпи сериозни последици. Воедно се отвораат и други дилеми, кој ќе преземе одговорност за ширењето на корона вирусот кога над 55,000 граѓани веќе трчаат во други банки да отвораат сметки. Кој ќе сноси одговорност доколку дел од овие граѓани поради целиот овој хаос останат без приходи следниот месец? Она што исто така загрижува е и што ќе се случува со македонска пошта. Граѓаните знаат дека во македонска пошта можеше да се плаќа сметки. Но тие незнаат дека системот кој што македонска пошта го користеше е на Еуростандард банка. Колку оваа одлука ќе има влијание на ликвидноста на македонска пошта и дали ќе влијае на бројот на вработени?
оедно со оваа одлука која се носи во најголема здравствена и економска криза без работа остануваа околу 170 вработени кои имаат свои фамилии.
Почитувани, оваа одлука отвора сериозни прашања за кои ние деновиве не добивме одговор.
Прашање: Госпоѓо Кочоска дали можете да ни кажете колкава штета државата би имала од ова пропаѓање на ваква банка директни и индиректни штети дали имате проценки некои?
Одговор: Видете Фондот за осигурување на депозити нели тука ќе ги покрие 4,4 милијарди, знаете каде е најголемиот проблем еве може и вие како новинари да проверите на сајтот на Народна Банка последните податоци за банките се од 31.03 што значи дека после тоа немаме точни податоци треба да ги погледнеме сите податоци па да видиме, државата ќе има штети поради тоа што ќе пропаднат сигурно дел од компаниите, вчера ме исконтактираа многу компании кои што имале пари на сметка по различни основи не само депозити нивните пари не се гарантирани. Кај граѓаните еден дел е гарантиран меѓутоа останува еден дел не гарантиран кој што ќе пропадне и тоа исто така не го слушнавме да ни кажат колкав е тој дел прво кај физичките лица кој што ќе пропадне. А за правните субјекти воопшто и да не дискутираме. И она што исто така е многу проблематично во моментот е ситуацијата со 170 вработени во банката и притоа што ќе се случува со Македонска Пошта мора да земете предвид дека налозите кога се плаќаа во Македонска Пошта се плаќаше провизија тие се најбрзи најликвидни пари кои што ги добиваше Македонска Пошта во вакви услови и поштата ќе остане без ликвидност. Така да и тука ќе имаме дополнителни проблеми. Но за да има посериозни проценки за реални бројки јас секогаш сакам да зборувам за бројки реални јас можам да зборувам со 31.03 и да ги анализирам претходните квартали но немаме со 30.06 вака официјално барем на сајтот на Народна Банка нема таков податок.
