Илјадници туристи имаа само неколку часа да се вратат во Велика Британија за да ги избегнат карантинските мерки наметнати кон Франција, што стапија на сила денеска. Двонеделна изолација е задолжителна од 4 часот наутро по лондоснко време и исто така се однесува на сите лица кои доаѓаат од Холандија, Монако, Малта, Островите Туркс и Каикос и Аруба, пишува Би-би-си.
Железничките линии низ „Евротунелот“ беа распродадени во петокот, а патниците скапо плаќале и за авионски билети, па дури и некои траекти го зголемиле капацитетот.
Франција предупреди дека ќе преземе реципрочни мерки, а Холандија ги предупреди своите граѓани да ги избегнуваат сите непотребни патувања во Велика Британија, иако тамошните власти порачаа дека нема да воведат реципрочни мерки.
Споменатите земји се најдоа под карантински ограничувања, бидејќи стапката на инфекција на нивната територија надмина 20 случаи на 100.000 жители во текот на седум дена, изјави британскиот министер за транспорт, Грант Шапс.
Тој за Би-би-си изјави дека во моментот во Франција има околу 160.000 британски туристи и порача дека последното нешто што го посакува е луѓето да се вратат дома и да ја донесат инфекцијата со себе.
Крајниот рок за да се вратат без 14-дневна изолација принуди многу патници да бркаат авиони, возови или траекти, за превоз кој чини и по стотици фунти.
