Ресорот земјоделство ќе го раководи Движењето Беса, но кој ќе биде министер, ќе се знае по вечерашниот состанок на централниот совет на партијата, соопшти претседателот на Беса, Билал Касами, по состанокот на лидерот на СДСМ, Зоран Заев, со првите луѓе на другите партии од коалицијата „Можеме“, што се одржа попладнево во седиштето на СДСМ.
„Движењето Беса ќе има важна улога во владејачкото мнозинство. Ќе раководиме со ресорот земјоделство и сигурно во другите ешалони на власта ќе имаме важна улога, во делот на заменик-министрите и директори на важни институции. Ова ќе биде придобивка за сите граѓани независно од нивната партиска или друга припадност. Сите функционери на Беса ќе бидат во нивна служба“, рече Касами.
Тој додаде дека сè уште не може да каже кој ќе биде министер и дека по седницата на централниот совет, ќе го потврдат и тоа.
