Мексиканскиот претседател Андрес Мануел Лопез Обрадор изјави дека треба да се вратат парите украдени од корумпираните функционери, еден ден откако се појави клучен сведок во неговата борба против корупцијата, кој обвини поранешни претседатели, министри и пратеници за злоупотреби.
Барањето на претседателот следеше откако завчера на мексиканските медиуми почна да се „врти” фотокопија од изјавата на Емилио Лозоја, поранешен извршен директор на националната нафтена компанија „Петролеос Мексиконос” (Пемек).
Лозоја ги обвини поранешните претседатели Фелипе Калдерон и Карлос Салинас за корупција, заедно со поранешниот претседател Енрике Пена Нието, неговиот поранешен министер за финансии Луис Видегарај и десетина други функционери.
-Тие треба да ги вратат парите, рече Лопез Обрадор за време на редовната утринска прес-конференција, без да прецизира за кого се однесуваше.
