Министерот за надворешни работи, Бујар Османи, денес оствари средба со амбасадорот на Соединетите Американски Држави, Н.Е. г-ѓа Кејт Мари Брнз.
„Остануваме посветени на продлабочување на стратешкото партнерство меѓу САД и Северна Македонија, како еден од главните приоритети на нашата надворешна политика, сега веќе проширено и со партнерството во северноатлантската алијанса”, изјави Османи, упатувајќи притоа искрена благодарност за континуираната и цврста поддршка од страна на САД за остварување на евроатланските цели на нашата држава.
Во оваа прилика, министерот Османи се осврна на успешно спроведените фер и демократски избори, укажувајќи дека Владата од првиот ден ќе продолжи со реформските процеси и со остварувањето на зацртаните приоритети.
„Членството во НАТО, не само што е валоризација на претходно оствареното, туку е и силен поттик за натамошна длабинска трансформација на општеството, во пресрет на почетокот на преговорите со Европската Унија, истакна Османи, посочувајќи ја земјава како силен и искрен партнер на САД во регионот.
Амбасадорот Брнз му го честиташе на министерот Османи преземањето на новата должност и му посака успех во работата, реафирмирајќи ја притоа силната поддршка на американската влада за продолжување на нашата реформска агенда посочувајќи и на стратегиското партнерство меѓу двете земји, дополнително зацврстено и преку сојузништвото во рамките на НАТО Алијансата.
