Иницијативниот одбор ги демантира ставовите на Петар Богојевски изнесени во Слободен печат во текстот насловен „Фингиран или реален судир за партискиот трон во ВМРО-ДПМНЕ”.
Иницијативата за одржување на вонреден конгрес за избор на ново раководство на ВМРО-ДПМНЕ е искрен обид за спас на партијата, нејзино реформирање и враќање на победничките патеки.
Какво е влијанието на Мартин Протугер врз Христијан Мицкоски не можеме да кажеме, но тоа што можеме со сигурност да потврдиме е дека тој не се придружи на иницијативата со која што се побара одговорност и оставка од сеуште актуелниот претседател Мицкоски. Можеби Протугер стои зад Мицкоски и го поддржува да опстои на функцијата смислувајќи стратегии, но тоа си е исклучиво нивен меѓусебен однос. Иницијативниот одбор е составен само од мал дел од членовите на партијата кои изминатиов период се приклучија и го поддржаа барањето за промени. Никој не ја киднапирал, ниту може да ја киднапира иницијативата. Добредојдени се сите кои го споделуваат ставот дека актуелното раководство ги истроши сите кредити и дека нема капацитет да ги придобие симпатиите на јавноста. Секој обид да се фрли дамка на искрените намери на иницијативата е обид да му се помогне на сеуште актуелниот Претседател Мицкоски и да му се обезбеди уште една сигурна победа на СДСМ на наредните избори.
