Езџан Алиоски и Илија Несторовски ги искористија пеналите со кои Македонија ја победи Ерменија во првото коло од новата сезона во Лигата на нации.
Голгетерот на Удинезе по подолг период постигна погодок во репрезентативниот дрес, но на крај беше позадоволен од тимскиот успех, пред оној поединечниот.
Не е важно дали јас или некој друг постигна погодок. Важни се бодовите и победата, со оглед на тешките услови за игра. Жешкото време и состојбата на теренот значително ни ја отежнаа работата. Не сакаме да бараме оправдувања, но тоа е реалната слика на денешната средба. Знаеме дека многу играчи не се во натпреварувачки ритам. Но, имаме доволно квалитетен состав за да ѝ се спротиставиме и на Грузија. Селекторот ќе може да направи многу измени во второто коло со цел да ја задржи свежината во екипата, изјави Несторовски.
Веќе во вторник Македонија ќе гостува кај Грузија во терминот од 18:00 часот.
