Авионскиот лет за Канада бил откажан затоа што тригодишно девојче не носело маска, а била повикана и полицијата, пренесува Би-би-си.
Садван Чудри, патникот кој требало да лета со „Вeст џет“, вели дека авиокомпанијата инсистирала на тоа неговата 19-месечна ќерка да мора да носи заштитна маска.
Но, од авиокомпанијата велат дека проблемот не бил во 19-месечното девојче, кое дури не морало да носи маска, туку во тригодишната ќерка на Чудри.
Би-би-си пишува дека летот „652“ од Калгари до Торонто бил откажан во вторникот наутро. На патниците им било речено да го напуштат авионот.
Чудри за Би-би-си изјави дека неговата постара ќерка, која има три години, јадела пред полетувањето. Во тој момент стјуардесите се приближиле до Чудри и го замолиле двете негови ќерки да стават маски на лицето. Тој вели дека и тој и неговата сопруга носеле маски.
Чудри ги замолил стјуардесите да бидат трпеливи за да може неговата постара ќерка да заврши со јадењето, но му било кажано дека имаат политика на нулта толеранција и дека нема да ја затворат вратата на авионот додека не ја стави маската. Чудри вели дека се согласил и ветил дека веднаш ќе им стави маски.
Тој за Би-би-си изјави дека на неговата тригодишна ќерка, по краткото негодување, ѝ ставил маска на лицето.
„Но, мојата помлада ќерка се бореше со тоа, таа практично беше хистерична“, рече Чудри додавајќи дека била толку вознемирена што повраќала.
Тој тврди дека вработените во „Вeст џет“ биле агресивни и му рекле дека целото семејство ќе мора да го напушти авионот затоа што неговата најмала ќерка не носела маска. Исто така, додава дека му било кажано дека ако не го напуштат авионот, може да бидат уапсени, обвинети и да завршат во затвор.
Чудри вели дека и тој и неговата сопруга на крајот се согласиле да го напуштат авионот.
Подоцна дознал дека официјалните патнички правила во Канада налагаат само деца над две години да носат маска, поради што неговата 19-месечна ќерка не морала да носи маска.
Во „Вeст џет“ го негираат тврдењето на Чудри дека тригодишното дете ставило маска на лицето.
„Родителите одбија да му стават маска на детето кое е постаро од две години поради што нашиот екипаж ги информира возрасните за прописите што треба да ги почитуваме. Нашиот екипаж побара присуство на органите на власта кога патниците одбија да ги почитуваат канадските мерки за превоз, а потоа одбија да го напуштат авионот“, се вели во соопштението на „Вeст џет“.
Видеото што го сними Чудри на својот мобилен телефон и го објави на „Твитер“ ја покажува неговата постара ќерка како носи маска откако полицијата влегла во авионот.
Чудри изјави дека некои од патниците му биле лути на неговото семејство, иако огромното мнозинство го поддржувало. Многумина застанале во нивна одбрана, додека најмладата ќерка плачела, вели Чудри.
Во тој момент екипажот на авионот повикал полиција, вели Чудри, по што тие го напуштиле авионот. Летот потоа бил откажан и преместен за следниот ден.
