Пратениците од БЕСА кои во Собранието влегоа преку листите на СДСМ неофицијално во допис го известуваат собранискиот спикер Талат Џафери дека ќе дејствуваат во коалицијата „Можеме“ со СДСМ, но како независни во пратеничката група и ќе ги застапуваат интересите на својата партија.
„Ова не е напуштање на коалицијата туку да се организираме подорбро и да работиме поефикасно како БЕСА во парламентот“, рече Кастриот Реџепи пратеник на БЕСА кој ќе биде одговорен да ги координира народните избраници со кои располга партијата.
Минатата недела до собранискиот спикер Талат Џафери стигнаа известувања за 4 пратенички групи и тоа на коалицијата „Можеме“ предводена од СДСМ и Беса, од ДУИ, од коалицијата „Обнова за Македонија“ предводена од ВМРО ДПМНЕ и од коалицијата Алијанса и алтернатива.
За да се формира пратеничка група според деловникот потребни се најмналку 5 пратеници. Координаторите на пратеничките групи учествуваат на состаноците кај собранискииот спикер за текот на седниците и точките на дневен ред.
БЕСА во парламентот има 4 свои пратеници, со што не може и формално да понесе барање за пратеничка група.
