Највисокото партиско тело на ВМРО-ДПМНЕ, Централниот комитет денеска попладне ќе одржи седница на која се очекува да биде избран нов Извршен комитет на партијата, пренеуваат повеќе медиуми.
Како што информираат од опозициската партија, новиот Извршен комитет ќе има помалку членови од актуелниот и ќе содржи неколку нови имиња кои како што велат од ВМРО-ДПМНЕ ќе му дадат дополнителна тежина и динамичност.
Новиот извршен комитет е дел од пакетот промени кои ги започна Претседателот Мицкоски веднаш по одржаните избори. Централниот комитет изгласа нов Статут кој беше поздравен како најдемократски од Европската Народна партија. Потоа се избра нов Претседател и нов Извршен комитет на УМС, се распиша оглас за избор на нов Претседател на Унијата на жени а воедно беа назначени нови претседатели на значителен број на општински комитети и тој процес ќе продолжи, брифираат од ВМРО-ДПМНЕ.
Од партијата додаваат дека на седницата на Централниот комитет која ќе почне во 18:30 часот ќе се расправа и за прашања поврзани со резултатите на изборите.
