Половина милион ајкули во светот би можеле да бидат убиени во потрагата по вакцината против Ковид-19, предупредува групата „Сојузници на ајкулите” (Shark Allies).
Се работи за органската материја сквален, којашто се извлекува од црниот дроб на ајкулите. На пр., за еден тон сквален потребни се меѓу 2.300 и 3.000 ајкули. Според организацијата, за сите луѓе на планетава да добијат вакцина за коронавирус, тоа ќе значи убивање на околу 250.000 ајкули. Две дози од вакцината би убиле половина милион ајкули и, тоа е, како што посочуваат оттаму, сериозна опасност за Земјиниот екосистем.
Фармацевтскиот гигант ГСК моментално користи сквален за вакцините против грип бидејќи ја подобрува ефикасноста на вакцината создавајќи посилна имунолошка реакција.
Според еколозите, треба да се најде начин да се создаде вештачки еквивалент на оваа животинско-растителна материја. Скваленот е природно органско соединение кое се извлекува главно од мастите од црн дроб на ајкула, но може да се добие и од семето на коприва, пченка, од оризот, маслинките… Сите растенија и животни во своето тело произведуваат одредена количина сквален, вклучувајќи ги тука и луѓето.
