Самостојниот синдикат на новинари и медиумски работници (ССНМ) ги повикува сите новинари и медиумски работници да номинираат медиум за кој сметаат дека го заслужува признанието „Медиум промотор на новинарството како јавно добро – Роберто Беличанец 2020″.
Комисијата за избор на добитник на оваа награда номинации ќе прима до 29 октомври 2020, а новинарите и медиумските работници номинациите може да ги испраќаат по електронска пошта на ssnm.info@gmail.com или на Фејсбук страната на ССНМ (https://www.facebook.com/Sindikatnanovinari/)
– Признанието ќе се додели на медиумот кој ги задоволува следниве критериуми: континуирано чувство за општествена одговорност, третирање на новинарството како јавно добро преку залагање за слобода на изразување, придржување до кодексот на новинари, третирање на теми од јавен интерес, како и коректен однос кон вработените – почитување на нивните работнички и професионални права, се вели во соопштението од ССНМ.
ССНМ во 2018 година ја воспостави годишната награда „Медиум промотор на новинарството како јавно добро” што го носи името на прерано починатиот борец за слобода на изразување и експерт за медиуми – Роберто Беличанец.
Оваа награда ССНМ ја доделува во партнерство со Македонскиот институт за медиуми, Институтот за комуникациски студии и Медиа дајверзити институтот од Лондон во рамките на проектот „Писменост за вести и дигитална писменост- Справување со лажните вести”, поддржан од Европската Унија.
