Лидерите на 27 земји-членки на ЕУ вечерва на виртуелен самит ќе разговараат за влошената епидемиолошка состојба и координација на мерките за борба против пандемијата на коронавирус. Претседателот на Европскиот совет Чарлс Мишел повикува на одлучна акција на европско ниво заснована на два столба: тестирање и следење на контактите и вакцините.
Бидејќи вакцината против Ковид-19, според претседателката на Комисијата Урсула фон дер Лајен, нема да биде достапна во најдобар случај пред април следната година, ЕУ става акцент на брзите тестови и ги следи контактите на заразените.
Мишел вели дека ПЦР-тестовите, кои досега беа фаворизирани и дадоа сигурни резултати, треба да бидат дополнети со антиген-тестови, кои иако се помалку сигурни, даваат резултати во рок од 15 минути и затоа овозможуваат побрзо и полесно идентификување на лицата кои носат вирус и се заразни, особено кога се асимптоматски.
Европската комисија во средата предложи серија мерки за забавување на ширењето на коронавирусот, кои вклучуваат, меѓу другото, помасовно и побрзо тестирање, подготовка на кампања за вакцинација и ефективни и интероперативни апликации за следење на контактите. Комисијата препорачува поширока употреба на антиген-тестови со брзо дејство и ги повикува земјите-членки да развијат национални стратегии за тестирање до средината на ноември. Комисијата ќе мобилизира 100 милиони евра за директна и брза набавка на антиген-тестови.
