Предизвиците, можностите и ефектите од ковид кризата кон бизнисите ќе бидат во фокусот на третата годишна конференција за е-трговија во државава „Е-трговија и Ковид-19: Предизвици и можности!”, која годинава ќе се одржи онлајн на 25-ти и 26-ти месецов.
Традиционално, во организација на Асоцијацијата за е-трговија на Македонија, конференцијата ќе биде место каде мноштво истакнати странски и домашни говорници од различни сектори поврзани со е-трговијата, преку предавања, панел дискусии и неформални разговори, ќе ја пренесат својата експертиза и искуство од областа на е-трговијата, ставајќи го во фокус влијанието на пандемијата врз растот на е-трговијата.
– Прилагодувајќи се целосно на состојбата предизвикана од ковид пандемијата и потребата на што повеќе бизниси да се префрлат кон онлајн продажба, оваа година конференцијата има за цел да го разоткрие и пренесе потенцијалот на е-трговијата, особено во време на глобална пандемија. Знаејќи дека промените се тешки, но неизбежни за раст и прогрес, со насловот „E-трговија & COVID-19: Предизвиците и можностите!” ќе ги опфатиме најактуелните теми како: лекции од е-трговијата за време на ковид-19, адаптацијата на комуникациска стратегија во време на криза, подобрување на искуството на е-купувачите преку обезбедување на корисничка услуга, зголемување на онлајн безбедноста и можностите кои ги пружа меѓуграничната е-трговија. Овие теми ќе бидат разработени заедно со над 30 домашни и меѓународни говорници и експерти во своите полиња., најавуваат од Асоцијацијата за е-трговија на Македонија.
Минатата година на конференцијата имаше 450 учесници, од околу 150 компании, организации, универзитети и владини институции, а презентации имаа 30 говорници од осум држави.
