Дружењето и музиката си го направија своето, споија уметници кои створија едно музичко дело – Sarah Mace и Eye Cue ви ги претставуваат песната и видеото „Трепет“, за како што велат тие, да влезат со трепет во есента. Песната е на Сара и е настаната пред неколку години, кога на Макфест е изведена од Тања Би, со аранжман на Дамир Имери. Идејата да се направи соработка за неа потекнала од Бојан, а премиерно е отсвирена од Сара и Eye Cue на Skopje Unplugged 2020.
-Бојан и Марија често пати ми зборуваа за оваа песна. Ова лето го искористивме слободното време кое што го имавме повеќе од вообичаеното, ја стокмивме „Трепет“ и ја отсвиривме премиерно на Skopje Unplugged 2020. Ни се допадна изведбата и како сето тоа звучеше, па решивме да ја крунисаме со спот за да влеземе со трепет во есента. Ова е за сите оние кои што знаат да уживаат и се среќни со тоа што го имаат“ – изјави Сара за настанувањето на „Трепет“.
Звуците на харфата на Сара и гитарата на Бојан даваат уникатен призвук кој смирува, а нивните гласови се совршена комбинација за целосно уживање во овие есенски денови. Музиката и текстот на песната се на Сара, со заеднички аранжман на Eye Cue и Сара, а е снимана во „Подрумот“. Видео спотот го направи Кристијан Шемко, а е сниман на локации од убавините од село Бојанчиште.
Сара Мејс и Марија од Eye Cue го почитуваат македонскиот дизајн и често го носат за своите настапи и видеа. За потребите на видеото за песната „Трепет“ Сара соработуваше со FRAN на Фросина Ангеловска, а Марија носи креација од македонскиот бренд Румор.
