По спроведена истражна постапка, Основното јавно обвинителство Скопје денеска поднесе Обвинителен акт против Јетон Љужа (21) од Скопје за убиството на Никола Саздовски во јуни 2018 година во Автокоманда. Љужа кон крајот на септември беше екстрадиран од Германија каде беше уапсен во ноември лани по бегството.
За убиството на Саздовски веќе се осудени Бесир Бела и Скендер Демири на по 19 години затвор, а за кои постапката беше радвоена. Тие пред една недела пред пелацискиот суд бараа да се преквалификува делото за кое се осудени- убиство на свиреп начин.
-Обвинетиот, заедно со уште две лица и за кои веќе е донесена првостепена пресуда на Основниот кривичен суд Скопје, на 29.06.2018 година на свиреп начин го лишиле од живот оштетениот Никола Саздовски. Тие му пристапиле на оштетениот на автобуска постојка на булеварот „Александар Македонски“ и му побарале лична карта. Кога оштетениот им ја покажал, тие му се обратиле со зборовите „А ти си тој Никола Саздовски викан Саздо“, по што сите тројца заедно започнале да го удираат со боксови во главата и градите. Од силината на ударите оштетениот изгубил рамнотежа и паднал на тротоарот, по што обвинетите продолжиле со клоци да го удираат во градите и главата. Од ударите Саздовски западнал во коматозна состојба и како резултат на наесените тешки телесни повреди починал на 09.07.2018 година на Одделението за анестезија и реанимација при Универзитетската клиника за трауматологија, ортопедски болести, анестезија, реанимација, интензивно лекување и ургентен центар – ТОАРИЛУЦ., стои во соопштението на ОЈО.
Со Обвинителниот акт јавниот обвинител до Основниот кривичен суд Скопје достави и предлог за продолжување на претходно определената мерка притвор, поради опасност од бегство на обвинетиот и можност тој да влијае врз сведоците.
