Државата плаќа повисока струја затоа што ги испразнија акумулациите и ги пресушија езерата, се офајдија само трговците на струја

Гордана Димитриеска-Кочоска,  која беше технички заменик-министер за финансии од страна на ВМРО-ДПМНЕ во техничката влада преку Фејсбук го коментираше поскапувањето на струјата, и образлоѓи причини за истото.

-Ние сме единствената држава во светот во која власт не е способна да види што ќе се случи во следните три месеци, а да не зборуваме за повеќе. И денес нема да пишувам за здравство зошто таму е повеќе од јасно дека не се способни ниту на неделна основа да предвидат.

Она што ме загрижува во моментот е состојбата со електроенергетскиот сектор. Сведоци сме дека во изминативе три години менаџерскиот тим на државната АД ЕСМ нема компас, ниту знае кај оди, па оттука водите се трошат без милост, акумулациите по неколку пати во годината се на минимум а невладините организации никаде ги нема да се бунат за живиот свет, ама истите тие пред 5 години беа многу гласни кога водата во акумулациите беше и на повисоко ниво од денешното.

Имам уште една мала дилема, дали е навистина до незнаењето или пак една грешка нѐ завлече сериозно надолу.

Пред нецели две години државната АД ЕСМ потпиша договор со АД ЕВН хоме согласно кој договори продажба на електрична енергија за 36,6 евра за MWh, што е пониска цена од производната (41-43 евра за 1MWh). Производната цена е комбинација од цената на хидрата (која е многу ниска под 20 евра за MWh) и цената на термото која е над 45 евра, но термото учествува многу повеќе во однос на хидрото. Оваа влада се труди да направи во континуитет поголемо учество на хидрото а тоа зависи од годината, последниве и не се така дождливи и снежни) за да ги намали трошоците, па оттука сите акумулации ни се празни. Ама пусто, колку и да ја покриваш пониската продажна цена, неспособноста ќе излезе на виделина. Во месец август се фалеа дека имаме вишоци на електрична енергија и продаваа со фалби за 43 евра. Ама еве во месец ноември АД ЕСМ не е во состојба да испорача дури ни тоа што го има по договор за АД ЕВН хоме. Па, оттука фирмата ќерка на АД ЕСМ, односно Елем Трејд спровела јавна набавка во која просечната цена по која ќе купи е околу 49,5 евра за MWh. Фирмите од кои ќе купи ги имате во прилог а меѓу нив се ТЕ-ТО и ЕДС.

Од друга страна цената по која електричната енегија се продава е 36,5 евра за 1MWh или тоа се некаде 13 евра за 1MWh. Или само за една недела загубата кај државната компанија е 156.000 евра. Тоа се 5 супермодерни амбулантни возила или 300 лаптопи или што уште не што сега е многу попотребно.

За крај можам само едно да заклучам, државата од оваа зделка покрај тоа што има загуба, изгуби многу многу повеќе. Во летниот период трошеа јаглен кој го има во ограничени количини за да произведат и продадат по ниски цени (летните продажни цени се пониски од зимските), а јагленот го нема, што во превод значи дека е многу “скап” или јас би рекла нема цена. Водата ја потрошија иако ја знаеја хидролошката состојба, па сега имаме празни акумулации и недостиг на струја. Згора на се немаме ниски температури, а тек да се повтори зимата 2017 со премногу ниски температури па да неможат и јаглен да копаат.

Останува само нејасно дали приватните трговци и во двата случаи одлично се офајдија и колку поединци од власта ќарија од истово.