– Европските власти подготвуваат голем број иницијативи за зајакнување на соработката со Вашингтон по инаугурацијата на демократот Џо Бајден, кој победи на претседателските избори во САД, објави „Волстрит журнал” повикувајќи се на извори.
Според изворите, претставници на европските власти, особено во Берлин, Париз и Брисел, очекуваат да постигнат договори со Бајден за градење поблиска трансатлантска соработка отколку сегашните односи со претседателот Доналд Трамп. Еден извор забележа дека ЕУ стравува од ситуација во која односите меѓу САД и земјите-членки остануваат на исто ниво поради недостаток на иницијатива од страна на европските власти.
Во врска со ова, европските политичари подготвуваат голем број предлози што ќе бидат упатени до администрацијата на Бајден.
Тие конкретно ќе се осврнат на теми како што се присуството на американските сили во Сирија и Авганистан, учеството на Вашингтон во решавањето на проблемите околу нуклеарната програма на Иран и враќањето на САД во Светската здравствена организација. Бајден увери дека ќе ја врати земјата во Светската здравствена организација и Парискиот климатски договор. Европејците исто така ќе се заложат за попродуктивен и колективен пристап кон Кина.
