Венецијанската комисија на Советот на Европа денеска ја претстави својата оценка за предлозите за измени и дополнувања на бугарскиот Устав. Мислењето е подготвено на барање на бугарската страна и е усвоено на 20 ноември. Тој е привремен и е усвоен по итна постапка, се вели во соопштението на прес-службата на Советот на Европа.
Мислењето ги разгледува предлозите за реформа на судството и обвинителството.
Венецијанската комисија изразува жалење што на првите чекори за уставните измени не им претходела соодветна јавна расправа, што предлозите биле изготвени од парламентарно мнозинство, се чини без никаков надворешен придонес и оти причините за некои предлози не се добро објаснети.
Сепак, за пофалба е што Венецијанската комисија беше вклучена во планираните измени толку рано, се додава во мислењето.
Бугарските власти мора да ги разјаснат причините за секој предлог за уставни измени и да обезбедат значајно јавно, експертско и широко политичко учество во овој процес, додава Комисијата.
Предлозите за промени што ги зголемуваат социјалните и економските права се добредојдени, но треба да се разјаснат обврските на државата да „промовира наталитет”. Ова не треба да се користи за оправдување на дискриминација на културните или етничките малцинства или на жените. Општо ограничување на правото на глас за осудените на затворска казна треба да се замени со пофлексибилно правило, според судската пракса на Европскиот суд на правдата, препорачува Комисијата.
Во врска со предлогот за намалување на бројот на пратеници во Националното собрание од 240 на 120, предложениот број изгледа произволен, без детална процена на влијанието на ваквиот потег врз бугарскиот политички систем, се вели во документот.
Поделбата на Врховниот судски совет е позитивно оценета и презентирани се препораки за понатамошна реформа во оваа насока.
Се истакнува и одлуката на Уставниот суд од 23 јули 2020 година, која е поздравена и се изразува очекување дека уставните измени ќе овозможат отстранување на главниот обвинител за време на истрага или кривично гонење против него.
Комисијата, исто така, очекува создавање можност за независна истрага на Главниот обвинител од страна на некој што не е подреден на него, како и судски надзор на налозите за одбивање истрага или гонење.
Венецијанската комисија го поздрави предлогот да се овозможи поднесување посебна жалба до Уставниот суд, како и упатување предмети од обичните судови до Уставниот суд. Комисијата смета дека ова ги подобрува личните права.
Во мислењето се вели дека предлогот за укинување на барањето за свикување на Големо национално собрание за олеснување на уставните измени не е во спротивност со европските правила. Ваква важна промена мора убедливо да се објасни, потребна е многу длабока јавна дискусија, се додава во мислењето.
